ટંકારાના લજાઈ ગામે કન્ટ્રકશનના ધંધા સાથે સંકળાયેલ ધંધાર્થીની ઓફિસ પાછળ રાખેલ વાહનોમાંથી એક જ રાતમાં ૧૩ નાની-મોટી બેટરીઓ કોઈ તસ્કર ચોરી કરી લઇ ગયાની ફરિયાદ ટંકારા પોલીસ મથકમાં નોંધાવવામાં આવતા ટંકારા પોલીસે અજાણ્યા ચોર ઈસમ વિરુદ્ધ ગુનો નોંધી તપાસનો ધમધમાટ શરૂ કર્યો છે.
સમગ્ર બેટરી ચોરી થયા અંગેની મળતી માહિતી અનુસાર ટંકારાના લજાઈ ગામે રહેતા પંકજભાઇ દયારામભાઇ મસોત ઉવ.૪૦ એ ટંકારા પોલીસ મથકમાં અજાણ્યા ચોર ઈસમો વિરુદ્ધ ફરિયાદ નોંધાવી જાહેર કર્યું કે ગત તા.૦૫/૦૪ના રાત્રીના ૧૧.૩૦થી સવારના ૭.૦૦વાગ્યા દરમિયાન પંકજભાઈની લજાઈ ગામે આવેલ કન્ટ્રકશન ઓફીસ પાછળ ખુલ્લામાં રાખેલ અલગ અલગ વાહનોમાંથી નાની-મોટી બેટરી નંગ ૧૩ જે એક બેટરી ની કી.રૂ.૪૦૦૦/- કુલ બેટરી નંગ-૧૩ જેની કી.રૂ. આશરે-૫૨૦૦૦/-ની કોઇ અજાણ્યો ચોર ઇસમ ચોરી કરી લઇ ગયાની ફરિયાદ નોંધાવતા હાલ ટંકારા પોલીસે ચોરી અંગે ગુનો દાખલ કરી અલગ અલગ દિશામાં તપાસના ચક્રો ગતિમાન કર્યા છે.
