મોરબી-વાંકાનેર નેશનલ હાઇવે ઉપર જાંબુડીયા ગામ નજીક માર્ગ અકસ્માતના બનાવમાં ટ્રક ટ્રેઇલરની ઠોકરે મોટર સાયકલ ચાલક યુવકનું મૃત્યુ નીપજ્યું હોવાના બનાવ મામલે મૃતકના નાનાભાઈની ફરિયાદને આધારે તાલુકા પોલીસે આરોપી ટ્રક ટ્રેઇલર ચાલક વિરુદ્ધ કાયદેસરની કાર્યવાહી હાથ ધરી છે.
મોરબીના નાની વાવડી ગામે સિદ્ધિ વિનાયક પાર્ક-૨ માં રહેતા મૂળ ધારી અમરેલીના સરસીયા ગામના વતની ધર્મેશભાઈ ભુપતભાઇ ચારોલીયા ગત તા.૦૩/૦૭ ના રોજ પોતાનું મોટર સાયકલ રજી.નં. જીજે-૧૪-એક્યુ-૧૬૧૬ લઈને મોરબી-વાંકાનેર નેશનલ હાઇવે ઉપરથી પસાર થતા હોય તે દરમિયાન જાંબુડીયા ગામ નજીક નાયરા પેટ્રોલપંપ સામે રોડ ઉપર ટ્રક ટ્રેઇલર રજી.નં. જીજે-૧૨-બીઝેડ-૨૧૫૧ ના ચાલકે પોતાનું વાહન ગફલતભરી રીતે તેમજ ફૂલ સ્પીડમાં ચલાવી ધર્મેશભાઈના મોટર સાયકલને ટક્કર મારી અકસ્માત સર્જ્યો હતો, જે અકસ્માતમાં ધર્મેશભાઈને હાથ-પગ અને શરીરે ગંભીર ઇજાઓ પહોચતા તેઓનું મૃત્યુ નીપજ્યું હતું, ત્યારે અકસ્માતની ઘટના મામલે મૃતક ધર્મેશભાઈના નાનાભાઈ ઘનશ્યામભાઈ ચારોલીયાએ મોરબી તાલુકા પોલીસ મથકમાં ટ્રક ટ્રેઇલર ચાલક વિરુદ્ધ ફરિયાદ નોંધાવી છે, જે આધારે તાલુકા પોલીસે આરોપી વિરુદ્ધ ગુનો નોંધી આગળની ધોરણસરની કાર્યવાહી હાથ ધરી છે.
