વાંકાનેરના રાતાવિરડા ગામ પાસે ટ્રક પલ્ટી મારી માથે પડતા એક રાહદારીનું મોત, બીજાનો પગ કપાયો

બનાવની પ્રાપ્ત વિગતો અનુસાર વાંકાનેર તાલુકાના સરતાનપર રોડ ઉપર રાતાવિરડા ગામ પાસે આજે બપોરના અઢી વાગ્યાના અરસામાં એક ટ્રક અચાનક પલ્ટી મારી ગયો હતો. આ વેળાએ ત્યાંથી પગપાળા પસાર થતા બે યુવાનો ઉપર આ ટ્રક પડ્યો હતો. જેના કારણે એક યુવાનનું ઘટના સ્થળે જ મોત નીપજ્યું હતું. જ્યારે બીજા એક યુવાનનો પગ કપાઈ ગયો હતો અને ગંભીર ઇજાઓ પહોંચી હતી. બનાવને પગલે રોડ ઉપર ટ્રાફીકજામ સર્જાયો હતો. સ્થાનિકોએ તુરંત જ ઇજાગ્રસ્ત થયેલા યુવાનને નજીકની હોસ્પિટલમાં ખસેડયો હતો જ્યાંથી તુરંત આ યુવાનને મોરબી સિવિલમાં હોસ્પિટલ ખસેડવામાં આવ્યો હતો. પોલીસે ઘટના સ્થળે પહોંચીને ટ્રાફિક ક્લિયર કરાવ્યો હતો, હાલ પોલીસે બન્ને યુવાનોની ઓળખ મેળવવાના પ્રયાસો હાથ ધર્યા છે.