મોરબી જિલ્લામાં અકસ્માતોનાં બનાવોમાં સતત વધારો થઈ રહ્યો છે. જેને પગલે વહીવટી તંત્ર પણ ચિંતિત છે. ત્યારે ગત તા-૧૧/૧૦/૨૦૨૨ ના રોજ કોઈ અજાણ્યા વાહન ચાલકે એક રાહદારીને હડફેટે લેતા તેમનું સારવાર દરમિયાન મોત નીપજ્યું છે.
મળતી માહિતી અનુસાર, તા-૧૧/૧૦/૨૦૨૨ ના સાંજના સમયે વેલાભાઇ નામના શખ્સ ટંકારા મોરબી રોડ પર આવેલ સમય ધડીયાળના કારખાના પાસેથી ચાલીને જઈ રહ્યા હતા. તે દરમિયાન પાછળથી પુરપાટ ઝડપે આવતા એક અજાણ્યા વાહન ચાલકે તેમને પછાડી દીધા હતા. જેમાં વેલાભાઇ નામના રાહદારીને ગંભીર ઇજા થતા તેઓને સારવાર માટે તાત્કાલિક હોસ્પિટલ ખસેડવામાં આવ્યા હતા. જ્યાં હાજર ડોક્ટરે તેમને તપાસી તેઓ કોમામાં છે તેમ જણાવી સારવાર ચાલુ રાખી હતી. ત્યારે સારવાર દરમિયાન ગઈકાલે રાહદારીનું મોત નિપજતા સમગ્ર મામલે ટંકારા પોલીસ સ્ટેશનમાં ઈ.પી.કો.કલમ- ૨૭૯,૩૩૭,૩૩૮,૩૦૪(અ) તથા એમ.વી.એકટ કલમ- ૧૭૭,૧૮૪,૧૩૪ મુજબ ગુનો નોંધવામાં આવ્યો છે.
