મોરબીના આલાપ રોડ ઉપર નવજીવન પાર્કમાં રહેણાંક મકાન બહાર બેઠેલા ૬૦ વર્ષીય મહિલાને સરનામું પૂછવાને બહાને આવેલ શખ્સે મહિલાના ગળણાથી સોનાનો ચેઇન ઝૂંટવીને નાસી ગયો હતો. જયારે ભોગ બનનાર મહિલા દ્વારા ચીલઝડપ કરનાર શખ્સની પાછળ દોડતા થોડે દૂર પાર્ક કરેલ પોતાના બાઈક ઉપર પલાયન થઇ ગયો હતો. ત્યારે સમગ્ર ચીલઝડપના બનાવ અંગે મહિલા દ્વારા મોરબી સીટી એ ડિવિઝન પોલીસ મથકમાં ફરિયાદ નોંધાવવામાં આવી છે.
મળતી વિગત અનુસાર મોરબીના આલાપ રોડ નવજીવન પાર્કમાં રહેતા મૂળ જુના ઘાટીલા ગામના વતની મંજુલાબેન કાંતિભાઈ હરજીવનભાઇ દેત્રોજા ઉવ.૬૦ ગત તા.૨૪/૦૪ ના રોજ સવારના પોતાના ઘરની બાજુમાં રહેતા પાડોશી મહિલા સાથે પોતાના રહેણાંક બહાર બેઠા હતા ત્યારે ત્યાં એક અજાણ્યો શખ્સ આવી ‘શ્રી હરિ એપાર્ટમેન્ટ’ ક્યાં આવેલ છે? તેમ કહી થોડીવાર બાદ અચાનક મંજુલાબેનના ગળામાં પહેરેલ અંદાજે ૧૬ ગ્રામના સોનાનો ચેઇન આચકી ભાગવા લાગ્યો હતો, ત્યારે મંજુલાબેન દ્વારા અજાણ્યા ચોર શખ્સ પાછળ દોડતા તે હાથમાં આવેલ નહિ. તથા બનવું સ્થળથી થોડે દૂર પાર્ક કરેલ બાઈક ઉપર ચીલઝડપ કરનાર શખ્સ નાસી ગયો હતો. ત્યારે સમગ્ર ચીલઝડપના આ બનાવ અંગે મંજુલાબેન દ્વારા મોરબી સીટી એ ડિવિઝન પોલીસ મથકમાં ૨૫ થી ૩૦ વર્ષની ઉમર ધરાવતા અને શરીરે ચેક્સવાળો શર્ટ પહેરેલા અજાણ્યા શખ્સ વિરુદ્ધ ફરિયાદ નોંધાવી હતી. હાલ પોલીસે અજાણ્યા આરોપી સામે ગુનો દાખલ કરી આરોપીને પકડી પાડવા અલગ અલગ દિશામાં તપાસના ચક્રો ગતિમાન કર્યા છે.
