માળીયા(મી) પોલીસે ગણતરીની કલાકોમાં ચોરીમાં ગયેલ બે ટન લોખંડના સળીયા, ચોરીમાં ઉપયોગ કરેલ વાહન સહિત રૂ.૧.૯૫ લાખનો મુદ્દામાલ કબ્જે કર્યો
માળીયા(મી)ના નવલખી રોડ ઉપર મોટા દહીંસરા ગામ નજીક શ્રીજી શિપિંગ કંપનીના પ્લોટ ઉપર બાંધકામનું કામ ચાલુ હોય ત્યારે બાંધકામમાં ઉપયોગમાં લેવાતા અલગ અલગ સાઈઝના બે ટન લોખંડના સળીયાની કોઈ અજાણ્યા ઈસમ દ્વારા ચોરી કરેલ હોય તેવી ફરિયાદ નોંધાઈ હતી. હાલ માળીયા(મી) પોલીસે લોખંડના સળીયાની ચોરી કરનાર ઇસમને ગણતરીની કલાકોમાં પૂર્વ બાતમીને આધારે પીપળીયા ચાર રસ્તા નજીકથી છોટાહાથી વાહનમાં ભરેલ ચોરી કરેલ લોખંડના સળીયા સાથે ઝડપી લઈ તેના વિરુદ્ધ કાયદેસરની કાર્યવાહી હાથ ધરી છે.
સમગ્ર ચોરીના બનાવની ટુક વિગત મુજબ નવલખી પોર્ટમાં આવેલ શ્રીજી શિપિંગ કંપનીની નવલખી-મોટા દહીંસરા રોડ ઉપર પ્લોટ આવેલ છે, જે પ્લોટમાં છેલ્લા છ મહિનાથી બાંધકામ ચાલુ હોય ત્યારે ગત તા.૨૯/૦૯ના રોજ રાત્રીના કોઈપણ સમયે આ બાંધકામ સાઇટ ઉપરથી કોઈ અજાણ્યો ચોર ઈસમ અલગ અલગ સાઈઝના બે ટન લોખંડના સળીયા ચોરી કરી લઈ ગયા અંગેની સાઇટ એન્જીનીયર દ્વારા માળીયા(મી) પોલીસ મથકમાં ફરિયાદ નોંધાવવામાં આવી હતી.
ત્યારે ઉપરોક્ત ચોરી બાબતે માળીયા(મી) પોલીસ ટીમને બાતમી મળેલ કે માળીયા મીંયાણા પોલીસ સ્ટેશનમાં તા-૩૦/૦૯ના રોજ નોંધાયેલ લોખંડના સળીયાની ચોરીના ગુનાનો શકમંદ ઇસમ ચોરી કરેલ લોખંડના સળીયા પોતાનુ વાહન છોટાહાથી રજી નં. જીજે-૨૦-એક્સ-૫૧૯૨ માં ભરીને નીકળનાર હોય જેથી મળેલ બાતમીને આધારે માળીયા(મી) પોલીસ ટીમ વોચમાં હોય તે દરમિયાન પીપળીયા ચાર રસ્તાથી મોટા દહીંસરા જવાના રસ્તા પર વાસુકી કોલ સામે ઉપરોક્ત છોટાહાથી વાહન લોખંડના સળીયા ભરીને ત્યાંથી પસાર થતા તેને રોકી સઘન પુછપરછ કરતા લોખંડના સળીયાની ચોરી કર્યાની કબુલાત આપી હતી. જેથી માળીયા(મી) પોલીસે જામનગર જીલ્લાના ધુંવાવ ગામના આરોપી પ્રવિણભાઇ રામજીભાઇ કણઝારીયા ઉવ. ૩૭ની અટકાયત કરી હતી. આ સાથે પોલીસે બે ટન લોખંડના સળીયા તથા છોટાહાથી વાહન સહિત ૧.૯૫ લાખનો મુદ્દામાલ જપ્ત કરી પકડાયેલ આરોપી સામે ગુનો નોંધી વધુ તપાસની તજવીજ હાથ ધરી છે.
ઉપરોક્ત સફળ કામગીરી માળીયા(મી) પોલીસ મથકના પીઆઇ આર.સી.ગોહીલ તથા હેડ કોન્સ.સમરથસિહ ઝાલા, પોલીસ કોન્સ. રવિભાઇ મીયાત્રા, પ્રવિણભાઇ પરમાર, બળદેવભાઇ બાવળીયા, જયપાલસિંહ ઝાલા દ્રારા કરવામાં આવી હતી.
